原來避風港唔係一個地方，而係你自己｜一杯｜半桶水｜廣東話

Liner notes

話咁快第20集。今集出街嘅時候，啱啱好係我搬入新屋嘅第二個星期。

我搬離咗由小學住到廿幾歲、同媽咪一齊生活咗大半世嘅地方。我好驚，驚冇咗最後一個避風港，驚自己搞唔掂。

直到我讀完法國哲學家巴舍拉嘅《空間詩學》，我先發現一個道理。佢話人類對空間嘅依戀，係因為空間承載咗我哋嘅內心世界。但一個活著嘅靈魂，唔會永遠停留喺同一個貝殼入面。

裝修嗰幾個月，我親手揀每一塊板材、每一部電器、每一個掣嘅位置。企喺空蕩蕩嘅新屋大廳，我終於明白：避風港從來唔係一個地址，而係你自己。

你有能力為自己重新築巢。

第20集，我想多謝一個人，就係多謝自己咁努力。

斟杯酒，敬自己。