每日搭同一班車，企同一個站，等同一班人。你以為大家有默契，河水不犯井水。直至落大雨，兩個關愛座打尖，仲要搵埋我傾計。我嬲，唔係因為淋濕，而係發現我一直將佢哋當成NPC，原來喺佢哋眼中我只係路人甲。人從來都唔係NPC。人係估你唔到嘅。今晚問自己：你對佢哋嘅好感，係尊重佢哋係一個人，定係純粹鍾意佢哋做你嘅背景板？
我幫我個內向男同事玩交友App，玩咗兩個星期。我發現無論開頭傾得幾開心，十句之內，女仔一定會問一句：「咁你返咩工㗎？」你仲未有機會展現你嘅幽默、你嘅溫柔、你嘅價值觀，你嘅職業已經變咗一張標籤，決定咗你值唔值得被繼續了解。沙特話過：「存在先於本質。」你唔係天生出嚟就係一個文員、一個工程師、或者一個CEO。你係一個完整嘅人，然後你選擇咗去做呢份工。你份工係你嘅選擇，但佢從來都唔係你嘅全部。今晚問自己一條問題：「如果聽日你冇咗份工，講唔出自己做邊行嘅時候……你，仲係邊個？」
你做錯事俾人鬧，你唔會喊。你俾人屈好委屈，你都頂得住。但當有人行過嚟，同你講一句：「我明，如果係我，我都會咁做。」你嗰副戴咗成日嘅面具，就會喺一秒鐘之內完全崩潰。今集講一個真實故事。一個客投訴、理性上完全正確、但情感上仆到直一直嘅故事。心理學話，呢種叫「情緒確認」。當你嘅委屈終於被人睇到，你嘅身體會用眼淚嚟釋放。今晚問自己一條問題：你上一次容許自己喺人面前喊，係幾時？喊，從來都唔係軟弱。喊，係你嘅身體喺話你知：你已經頂得太耐喇。
《被討厭的勇氣》——有人話佢係救命恩人，有人話佢係垃圾。對我嚟講，佢係我人生第一本哲學書，係我嘅 「哲學初戀」 。第一次睇完，成個世界觀俾人打散再重組。但活多幾年，我發現一件好諷刺嘅事：同一本書，有人讀到自由，有人讀到自私。今集唔係要推薦你睇呢本書，而係想同你傾：你掛喺口邊嗰句「做自己」，到底係幫你活得更寬容，定係純粹幫你嘅自私，搵一個靚嘅藉口？哲學初戀啫，邊有人初戀就識結婚㗎。
有冇試過，當你好撚唔開心嘅時候，身邊啲人走嚟同你講：「加油啊」、「睇開啲啦」、「唔好諗咁多啦」。呢啲嘢真係難聽過粗口。今集講一本我幾年睇完、今次emo再拎返出嚟嘅書——《蛤蟆先生去看心理醫生》。書入面有三個概念：情緒溫度計——你而家喺1到10嘅邊個位？兒童自我狀態——你嘅情緒爆發，究竟係對緊而家件事，定係對緊童年嗰個受傷嘅細路？「我們『選擇』了自己的感受」——你以為你俾人搞到好嬲，但原來你係「選擇」咗用憤怒去回應。今集最後有一個練習：「你而家嘅情緒，喺邊個位？你允唔允許自己，喺呢個數字度停留一陣？」飲住聽，聽完問自己一句：「我收到自己嘅訊號未？」
今晚臨瞓前，我想留低一條問題畀聽緊呢集嘅你： 你依家心入面嗰種無端端嘅煩躁同委屈，你到底仲想格硬搵藉口去壓抑佢幾耐？如果你都試過冇原因咁唔開心，聽日仲要繼續無功能咁返工、繼續 OT——聽我話，今晚放過自己。斟杯酒，同自己講：「我今日就係想 emo，唔使向邊個解釋。飲杯！」飲晒佢啦，聽日再諗。飲杯！
碌Threads成日見到人抱怨：「我幫佢咁多，佢連多謝都冇」、「佢成日踩我底線，當我老馮」。今日我想講一個我自己都犯過嘅病——「理所當然綜合症」。澳洲心理學家George Ded喺《自我邊界》入面話：「除非我自己願意，否則你改變唔到我嘅情緒。」我用一個真實例子——因為生日冇約對方，結果斷交幾年——去拆解「理所當然」有幾荒謬。你覺得人哋「應該」點點點，但人哋根本唔知你嘅劇本。書入面金句：「好多人對你失望，係因為你冇滿足佢哋嘅期望。但事實上，佢哋嘅期望本身先係問題。」今晚邊飲邊問自己：「我嘅呢個『應該』，係邊個教我嘅？呢件事，到底係我嘅事，定係佢嘅事？」斟杯酒，同自己講：「我嘅事，我負責；人哋嘅事，我尊重。我嘅快樂，我自己話事。」——P.S. 今集冇講稿，即興分享咗兩件最近發生嘅事，有啲亂，但係好真實。希望之後每10集我都會咁樣update一次，同大家傾下近況。
今晚冇開場白，冇飲酒吹水，直接用一個故仔轟炸你。一個關於革命、權力、背叛嘅故仔——《動物農莊》。一班動物推翻人類統治，以為可以建立公平社會，點知最後望住牆上嘅誡律，分唔清邊個係豬、邊個係人。作者寫嘅唔止係寓言，而係一記耳光：「權力趨向腐化，絕對權力絕對腐化。」用5分鐘，聽我分享呢個故仔。飲晒佢啦，聽日再諗。
「真正令我哋痛苦嘅，從來都唔係『失去』呢件事本身，而係我哋面對失去嗰陣，自己對自己講嘅故事。」隻貓走咗、份工冇咗、或者一段關係無疾而終。你望住鏡入面嘅自己，係咪突然覺得心入面穿咗個窿，自己好似唔再完整？今集《一杯》，同大家分享一本改變人生嘅書——《心的重建》今晚，唔好聽完就算。拎起你杯酒，行去廁所望住塊鏡，跟住「醉街女孩」一齊做個練習。 「世界會變，人會走，但我值得完整，因為我一直都喺度。飲杯！」
我以前覺得冥想好扮嘢，叫我「咩都唔好諗」，個腦反而更嘈。冥想唔係「冇念頭」，而係當個腦又開始loop焦慮，你輕輕帶返注意力去呼吸——就好似幫開咗50個Tab嘅大腦做一次Cleanup。今集仲會一齊試一分鐘冥想，唔使盤腳，望住杯酒就得。飲住聽，聽完試下：你上一次完全專注喺當下，係幾時？
朋友生仔，我幫唔到手，淨係識狂撳電話等消息。David Hume話，情感好似琴弦，你痛到喊，我靈魂都會跟住嗡。呢種心痛，係證明：就算大家條路唔同咗，我哋都仲同步緊。因為你知道，第二朝起身，總有個傻人喺度猛咁 refresh 等你報平安。今晚諗下：你心痛，係擔心佢？驚自己將來都要經歷？定係因為永遠冇法真正明佢？無論係捱緊苦嗰個，定係得個睇字既你，仲肯去愛、去心痛，已經好叻。
「明明成班人喺度，返到屋企嗰種空虛感反而放大咗十倍。」以前去 party 唱 K 覺得好熱鬧，而家只覺得喺無效社交？用「刺蝟法則」拆解現代人嘅社交困境，太近會被假笑同無聊對話刺傷，太遠又會凍到寂寞。一個星期有 3:2 嘅寂寞與爽，已經係賺咗嘅自由。飲住聽，聽完諗：你嘅「中庸距離」係幾多？你最近一次覺得「一個人好爽」做緊咩？你最近一次覺得「寂寞」，又喺因為咩？
Build your own in under 5 minutes. Preview before you sign up — no credit card needed.
Create your free site →