尋晚我喺Netflix睇《Friends》，一邊睇一邊碌IG Reels。即係我一個人，同時睇緊兩個Mon。我唔覺得有問題，甚至覺得好「高效能」。然後我諗返細個。細個睇電視，去廁所？等廣告先。攞雪糕？等廣告先。嗰陣一個廣告位，係你唯一願意離開電視嘅時間。但而家？我哋消滅咗廣告位，亦都消滅咗「滿足感」。法國哲學家帕斯卡幾百年前已經講過：「人類所有嘅不幸，都源於佢哋唔能夠安靜咁坐喺自己房間入面。」你睇嘅唔係娛樂，你食緊嘅係「數位止痛藥」。你唔係難以被滿足，你係不敢停低。
你有冇試過搵到一件舊衫、一張舊相，望住嗰個幾年前嘅自己——眼神仲有光，可以為咗一個人衝動到不顧一切。然後你望返今日嘅自己：攰、冷靜、做每件事之前都要計過度過。你心入面嘆口氣：「點解我變到咁廢？」你將過去嗰個最靚嘅自己，變成咗一把尺。然後每日拎住呢把舊尺，去量度今日已經好攰好攰嘅自己，再狠狠地扣自己分。但你有冇諗過，你用十年前嘅尺去量度今日扛住成個世界嘅自己，對今日嘅你，公平咩？今集《一杯》E23，醉街女孩同你傾：有啲嘢，唔係失去，而係完成。
話咁快就十月。2026年淨返三個月。心理學有個現象：細個嗰陣，一個暑假好似一輩子咁長；大個之後，幾個月眨吓眼就過。因為細個嗰陣世界係新嘅，你嘅大腦每日都接收緊新刺激。但大個之後，你嘅生活變成咗「自動導航」——同一條路線返工、同一個位食飯、同一種情緒崩潰。當你每日都一模一樣，你嘅大腦會自動刪除呢啲重複嘅記憶。今集用一套舊戲《命運自選台》（Click）講「自動導航」有幾恐怖。主角用遙控器跳過所有佢覺得煩嘅事，結果跳過咗仔女嘅成長、跳過咗同老婆嘅親密、跳過咗同老竇最後嘅見面。佢活咗十年，但實際上只係將「返工、Skip屋企人」呢一日，重複咗三千幾次。你呢？你今年係真係活咗十個月，定係只係將「返工、放工、碌電話」呢一日，重複咗三百幾次？最後三個月，唔係用嚟遺憾嘅，係用嚟覺醒嘅。
搬過屋嘅人都知，執嘢係成件事最痛苦嘅部分。你以為自己生活好簡單，但一打開櫃桶，你會發現：點解我有咁多嘢？我由大屋搬細屋，被迫逐件物件審判：留，定掉？我摷出媽咪件衫，聞到佢嘅氣味，最後放低咗。我打開由細到大嘅獎狀箱，望住十年前拎獎嘅自己，然後成箱掉咗。我發現：留住一件嘢，唔代表留住一個人。放低一件嘢，亦唔代表你要忘記佢。海德格話，你今日選擇在意啲咩，你就會成為一個咩人。與其問「我仲應該留住啲咩」，不如問一個更有力嘅問題：「眼前呢樣嘢，到底係我未來需要嘅，定係我唔敢放低嘅？」
話咁快第20集。今集出街嘅時候，啱啱好係我搬入新屋嘅第二個星期。我搬離咗由小學住到廿幾歲、同媽咪一齊生活咗大半世嘅地方。我好驚，驚冇咗最後一個避風港，驚自己搞唔掂。直到我讀完法國哲學家巴舍拉嘅《空間詩學》，我先發現一個道理。佢話人類對空間嘅依戀，係因為空間承載咗我哋嘅內心世界。但一個活著嘅靈魂，唔會永遠停留喺同一個貝殼入面。裝修嗰幾個月，我親手揀每一塊板材、每一部電器、每一個掣嘅位置。企喺空蕩蕩嘅新屋大廳，我終於明白：避風港從來唔係一個地址，而係你自己。你有能力為自己重新築巢。第20集，我想多謝一個人，就係多謝自己咁努力。斟杯酒，敬自己。
我因為朋友轉話題講貓，直接唔再同佢哋見面，連生日飯都唔去。我以為自己好有邊界感。直到我睇咗哈佛談判項目嘅《高難度對話》，我先發現原來我嘅冷漠離開，可能只係唔敢面對現實嘅懦弱。書入面嘅「三層對話」拆解咗：你以為你嬲件事，其實你嬲嘅係「佢咁做係咪代表我唔重要？」真正嘅連結，唔係來自從不衝突嘅關係，而係來自衝突面前，仲敢講出脆弱嘅勇氣。
我講緊媽咪過身嘅事，講到第二句，朋友眼濕濕咁話：「死啦，我好擔心我隻貓⋯⋯」嗰一刻我發現，原來我嘅痛苦喺佢眼中咁微不足道。今集講哈佛教授寫嘅《同理心的力量》。佢細佬喺佢開導完之後自殺，佢先發現所有「為你好」嘅建議，喺絕望面前都係廢話。書入面講一個重要區分：同情心係企喺岸上望住你浸親，同理心係跳落水陪你感受嗰種凍。聽完之後問自己：你上一次真正聽人講嘢，唔畀建議、唔轉話題，係幾時？
全球銷量僅次於《聖經》，文青話係「寫俾大人嘅終極童話」，但係我打開咗三次，每次睇唔夠五頁就想閂書。今集用一個社畜嘅清醒視角，拆解呢本「神作」背後嘅文青式情緒勒索。小王子住喺冇壓力嘅星球，然後指責地球人太功利，呢種離地批判，對住為兩餐奔波嘅普通人嚟講，算唔算一種殘忍？你唔鍾意《小王子》，唔代表你麻木。你只係活喺現實。
每日搭同一班車，企同一個站，等同一班人。你以為大家有默契，河水不犯井水。直至落大雨，兩個關愛座打尖，仲要搵埋我傾計。我嬲，唔係因為淋濕，而係發現我一直將佢哋當成NPC，原來喺佢哋眼中我只係路人甲。人從來都唔係NPC。人係估你唔到嘅。今晚問自己：你對佢哋嘅好感，係尊重佢哋係一個人，定係純粹鍾意佢哋做你嘅背景板？
我幫我個內向男同事玩交友App，玩咗兩個星期。我發現無論開頭傾得幾開心，十句之內，女仔一定會問一句：「咁你返咩工㗎？」你仲未有機會展現你嘅幽默、你嘅溫柔、你嘅價值觀，你嘅職業已經變咗一張標籤，決定咗你值唔值得被繼續了解。沙特話過：「存在先於本質。」你唔係天生出嚟就係一個文員、一個工程師、或者一個CEO。你係一個完整嘅人，然後你選擇咗去做呢份工。你份工係你嘅選擇，但佢從來都唔係你嘅全部。今晚問自己一條問題：「如果聽日你冇咗份工，講唔出自己做邊行嘅時候……你，仲係邊個？」
你做錯事俾人鬧，你唔會喊。你俾人屈好委屈，你都頂得住。但當有人行過嚟，同你講一句：「我明，如果係我，我都會咁做。」你嗰副戴咗成日嘅面具，就會喺一秒鐘之內完全崩潰。今集講一個真實故事。一個客投訴、理性上完全正確、但情感上仆到直一直嘅故事。心理學話，呢種叫「情緒確認」。當你嘅委屈終於被人睇到，你嘅身體會用眼淚嚟釋放。今晚問自己一條問題：你上一次容許自己喺人面前喊，係幾時？喊，從來都唔係軟弱。喊，係你嘅身體喺話你知：你已經頂得太耐喇。
《被討厭的勇氣》——有人話佢係救命恩人，有人話佢係垃圾。對我嚟講，佢係我人生第一本哲學書，係我嘅 「哲學初戀」 。第一次睇完，成個世界觀俾人打散再重組。但活多幾年，我發現一件好諷刺嘅事：同一本書，有人讀到自由，有人讀到自私。今集唔係要推薦你睇呢本書，而係想同你傾：你掛喺口邊嗰句「做自己」，到底係幫你活得更寬容，定係純粹幫你嘅自私，搵一個靚嘅藉口？哲學初戀啫，邊有人初戀就識結婚㗎。
Build your own in under 5 minutes. Preview before you sign up — no credit card needed.
Create your free site →Verification couldn't load. Please refresh and try again.