有冇試過，當你好撚唔開心嘅時候，身邊啲人走嚟同你講：「加油啊」、「睇開啲啦」、「唔好諗咁多啦」。呢啲嘢真係難聽過粗口。今集講一本我幾年睇完、今次emo再拎返出嚟嘅書——《蛤蟆先生去看心理醫生》。書入面有三個概念：情緒溫度計——你而家喺1到10嘅邊個位？兒童自我狀態——你嘅情緒爆發，究竟係對緊而家件事，定係對緊童年嗰個受傷嘅細路？「我們『選擇』了自己的感受」——你以為你俾人搞到好嬲，但原來你係「選擇」咗用憤怒去回應。今集最後有一個練習：「你而家嘅情緒，喺邊個位？你允唔允許自己，喺呢個數字度停留一陣？」飲住聽，聽完問自己一句：「我收到自己嘅訊號未？」
今晚臨瞓前，我想留低一條問題畀聽緊呢集嘅你： 你依家心入面嗰種無端端嘅煩躁同委屈，你到底仲想格硬搵藉口去壓抑佢幾耐？如果你都試過冇原因咁唔開心，聽日仲要繼續無功能咁返工、繼續 OT——聽我話，今晚放過自己。斟杯酒，同自己講：「我今日就係想 emo，唔使向邊個解釋。飲杯！」飲晒佢啦，聽日再諗。飲杯！
碌Threads成日見到人抱怨：「我幫佢咁多，佢連多謝都冇」、「佢成日踩我底線，當我老馮」。今日我想講一個我自己都犯過嘅病——「理所當然綜合症」。澳洲心理學家George Ded喺《自我邊界》入面話：「除非我自己願意，否則你改變唔到我嘅情緒。」我用一個真實例子——因為生日冇約對方，結果斷交幾年——去拆解「理所當然」有幾荒謬。你覺得人哋「應該」點點點，但人哋根本唔知你嘅劇本。書入面金句：「好多人對你失望，係因為你冇滿足佢哋嘅期望。但事實上，佢哋嘅期望本身先係問題。」今晚邊飲邊問自己：「我嘅呢個『應該』，係邊個教我嘅？呢件事，到底係我嘅事，定係佢嘅事？」斟杯酒，同自己講：「我嘅事，我負責；人哋嘅事，我尊重。我嘅快樂，我自己話事。」——P.S. 今集冇講稿，即興分享咗兩件最近發生嘅事，有啲亂，但係好真實。希望之後每10集我都會咁樣update一次，同大家傾下近況。
今晚冇開場白，冇飲酒吹水，直接用一個故仔轟炸你。一個關於革命、權力、背叛嘅故仔——《動物農莊》。一班動物推翻人類統治，以為可以建立公平社會，點知最後望住牆上嘅誡律，分唔清邊個係豬、邊個係人。作者寫嘅唔止係寓言，而係一記耳光：「權力趨向腐化，絕對權力絕對腐化。」用5分鐘，聽我分享呢個故仔。飲晒佢啦，聽日再諗。
「真正令我哋痛苦嘅，從來都唔係『失去』呢件事本身，而係我哋面對失去嗰陣，自己對自己講嘅故事。」隻貓走咗、份工冇咗、或者一段關係無疾而終。你望住鏡入面嘅自己，係咪突然覺得心入面穿咗個窿，自己好似唔再完整？今集《一杯》，同大家分享一本改變人生嘅書——《心的重建》今晚，唔好聽完就算。拎起你杯酒，行去廁所望住塊鏡，跟住「醉街女孩」一齊做個練習。 「世界會變，人會走，但我值得完整，因為我一直都喺度。飲杯！」
我以前覺得冥想好扮嘢，叫我「咩都唔好諗」，個腦反而更嘈。冥想唔係「冇念頭」，而係當個腦又開始loop焦慮，你輕輕帶返注意力去呼吸——就好似幫開咗50個Tab嘅大腦做一次Cleanup。今集仲會一齊試一分鐘冥想，唔使盤腳，望住杯酒就得。飲住聽，聽完試下：你上一次完全專注喺當下，係幾時？
朋友生仔，我幫唔到手，淨係識狂撳電話等消息。David Hume話，情感好似琴弦，你痛到喊，我靈魂都會跟住嗡。呢種心痛，係證明：就算大家條路唔同咗，我哋都仲同步緊。因為你知道，第二朝起身，總有個傻人喺度猛咁 refresh 等你報平安。今晚諗下：你心痛，係擔心佢？驚自己將來都要經歷？定係因為永遠冇法真正明佢？無論係捱緊苦嗰個，定係得個睇字既你，仲肯去愛、去心痛，已經好叻。
「明明成班人喺度，返到屋企嗰種空虛感反而放大咗十倍。」以前去 party 唱 K 覺得好熱鬧，而家只覺得喺無效社交？用「刺蝟法則」拆解現代人嘅社交困境，太近會被假笑同無聊對話刺傷，太遠又會凍到寂寞。一個星期有 3:2 嘅寂寞與爽，已經係賺咗嘅自由。飲住聽，聽完諗：你嘅「中庸距離」係幾多？你最近一次覺得「一個人好爽」做緊咩？你最近一次覺得「寂寞」，又喺因為咩？
你唔係佢，你永遠唔會知佢表面嘅輕易，背後要咬緊牙關幾多次。今集醉街女孩由自己經歷講起，被同事誤解「情緒控制得好輕易」，後來先發現對方背後嘅掙扎。我哋成日將自己嘅標準套喺人哋身上，但每個人都有自己嘅戰場。透過《玩轉腦朋友》嘅啟發，學識「唔好夾硬逼人開心返」，以及點樣用一杯酒嘅陪伴，代替無謂嘅鼓勵說話。飲住聽，聽完反思：你最近有冇用自己把尺去量人？
攞住假紙都要返工，做完 gym 之後後悔浪費時間，醉街女孩由自己嘅「網球手」經歷講起，引入韓炳哲《倦怠社會》，拆解現代人點樣不知不覺成為自己嘅奴隸主。你連休息都會有罪惡感？呢份罪惡感係邊個塞入你個腦嘅？飲住聽，聽完問自己：如果我今日乜都唔做，仲有冇資格生存？
今集「醉街女孩」同你傾吓，點解一個「半桶水」都冇嘅人，會走去睇哲學？你有冇試過，明明好攰但係瞓唔落，因為個腦入面有兩個「自己」喺度打大交？一個叫你辭職，一個叫你供樓；一個叫你追夢，一個叫你照鏡。如果你今晚都有飲緊嘢，喺你個杯飲完之前，諗下：「我而家做緊嘅嘢，有幾多係真係我想做，有幾多係因為怕人哋話我？」
你有冇諗過，點解收工嗰啖啤酒特別爽？係因為酒精生產咗快樂，定係佢只係幫你「借咗未來嘅快樂」過嚟用？到底我哋依賴緊嘅係酒精，定係嗰種「唔使對自己負責」嘅空間？如果你今晚都準備飲一杯，不如入嚟聽下，你依賴緊嘅嘢，係咪真係令你快樂？
Build your own in under 5 minutes. Preview before you sign up — no credit card needed.
Create your free site →Verification couldn't load. Please refresh and try again.